«Ата журтчу» депутаттарга райондук соттун өкүмү чыккандан кийин соттолгондор Бишкек шаардык сотуна арыз менен кайрылышкан. 2-май күнү буга чейинки уктурулган өкүмдү негизсиз деген арыздан тышкары «ата журтчулардын» адвокаттары үч депутат менен анын жан сакчыларынын баш коргоо чарасын өзгөртүп, камактан бошотууну өтүндү. Бул процесске соттолуучулардын тарапташтары жана журналисттер да чогулушту.
Соттук процесс башталардын алдында депутаттардын тарапташтарынын бири Жанат Акматова залда отуруп кабар жазып жаткан super.kg порталынын кабарчысы Ширин Жумадиловага келип орунун бошотуп берүүнү талап кылып, албууттана колундагы фотоаппаратты, нетбукту жана сумкасын жулуп алып, сөгүп, түртүп отуруп алган. Кабарчыбыз Ширин Жумадилова буюмдарын кайра алууга аракет жасаганда аял жулмалап, «Силер, журналисттер, проституткаларсыңар, мага демектен жерге отуруп жаз!» деп дагы ойго-түшкө кирбес сөздөрдү айтып сөгүптүр. Кабарчыбыз мындай бейбаштык үчүн чара көрүлүүсүн сурап ошол жердеги милиция кызматкерлерине арыз жазды. Ал аял түшүнүк кат жазып жатканда бөлмөгө «Ата Журт» партиясынын өкүлдөрү бастырып киришип, «кысым көрсөтүлүп жатат» деген чуу менен аялды алып чыгып кетишти. Имараттын сыртында алар Ширин Жумадиловага акарат келтирүүнү улантып, милиция кызматкерлеринин жанында болушунча кыйкырып, мушташ-уруш, жок эле дегенде чыр чыгарууга аракет кылышты. Албетте, милиция кызматкерлери провокацияга алдырышпай, ал аялга чыр чыгарууга жол беришкен жок. «Кабарчы кызды уруш, жаңжал чыгар, фотоаппаратын жулуп ал, маданиятсыз сөздөр менен сөк, жулкулдат» деп бирөө мажбурлагансып, өзүнүн бейбаштыгын бийликке түртө салгысы келген аял «мунун баары бийликтин буюртмасы, менден кантип өч алуунун айласын таппай жүрүп, ушуну ойлоп табышты» деп кыйкыра баштады. Айтор, уурусу күчтүү болсо ээсин доого жыгат кылгысы келишти эле, ал аракеттеринен майнап чыкпады.
Камчыбек Ташиев кезегинде журт башы болом деп ат салышкан адам. Колдоочуларынын бул өңдүү бейбаш, маданиятсыз, ажаан жоругу Камчыбек мырзага эч кандай аброй алып келбейт, тескерисинче, жүз миңдеген адамдардын кыжырдануусун жаратат.

Эльвира Караева
politika@super.kg