18-декабрь жылнаамада Мигранттардын эл аралык күнү деп белгиленген. Дал келүүбү же коркунучтун коңгуроосубу, 16-декабрда интернетке «Патриоттордон» кордук көргөн дагы бир кыз тууралуу видео жайылды.

САПАРГҮЛ,ЭМИ АЙНАГҮЛ...
Интернетте «башка улуттун өкүлү менен жүрөсүң» деген негизде сабалган кыргыз кызы тууралуу жаңы тасма пайда болду. Видеодон «тарбиялык саатты» жүргүзгөндөр экөө экендиги байкалат, бири оозго алгыс уят сөздөр менен сөгүнүп, колго түшкөн кызды ур-токмокко алса, экинчиси анын баарын видеого тартып турганы билинет. Өзүн Айнагүлмүн деген кыз башка улуттардын эркектери менен жүрбөгөнүн, бейтааныш адамдан жөн гана жол сураганын айтып, кол көтөрүп жаткан жигиттерден ыйлап-жалбара кечирим сурайт. Азырынча бул тасманын качан, кай жерде жана кимдер тарабынан тартылгандыгы белгисиз. Бирок видео окуя Подмосковьеде орун алган деген негиз жаратат.
Эске салсак, былтыркы жылы ушундай эле өңүттөгү видео коомчулукта чоң талкууну жараткан болчу. Орусияда өздөрүн «Патриот» атап алган жигиттердин тобу бар экени, анын мүчөлөрү башка улуттун өкүлдөрү менен жүргөн кыргыз кыздарын жазалашары тууралуу айтылган эле. Анын биринде кордук көргөн Сапаргүл аттуу айым биздин гезитке кеңири маек берген. ИИМде резонанстуу бул кабар жөнүндө маалымат жок экен. Ички иштер министрлигинин басма сөз кызматынын өкүлү Эрнис Осмонбаевге кайрылсак: «Сапаргүл боюнча кылмыш иши Орусияда козголуп, Кыргызстанда туулган, бирок жарандыгы белгисиз 1982-жылкы 2 эркек киши кармалган. Андан ары окуя эмне болуп аяктагандыгынан кабарыбыз жок. Ал эми жаңы чыккан видео боюнча тиешелүү бөлүмдөрдүн кызматкерлери териштирүүнү башташты»,- деп жооп узатты.

МИГРАНТТАРГА КОЛ САЛУУ ТЫЙЫЛБАЙ ЖАТАТ
Москвада өткөн аптада эки кыргыз эмгек мигрантына улутчул жаштар кол салышты. Окуя кыргыз жигиттери жумушунан кечкисин кайтып келе жатышканда орун алып, капыстан көчөдөн кол салган улутчул балдар отвёртка менен экөөнүн кулактарын тешип салышкан. Жабыркоочулар медициналык кызматкерлерге кайрылышкан, бирок полиция кызматкерлерине кол салгандардан чочулашып арыз жазышкан эмес. Минтип улутчулдардын кылмышы көз жаздымда калып жатканда орус бийлиги да жаңы жылдан тартып мигранттарга карата мамилесин кыйындатмай болууда. Эмгек, миграция жана жаштар министри Алиясбек Алымкуловдун айтымында, 2014-жылдын январынан тарта Орусиянын аймагында мигранттардын жүрүшү ого бетер оорлойт. Буга аталган өлкөнүн миграциялык мыйзамдарынын күчөшү жана Сочиде кышкы Олимпиада оюндарынын өткөрүлүшү себеп. Бул аралыкта Эмгек, миграция жана жаштар министрлиги Орусиянын Федералдык миграция кызматы берген маалыматка таянып, 2013-жылдын 1-январынан 30-ноябрына чейин бул өлкөгө 624,6 миң Кыргызстандын жараны барганын билдирди. Аталган министрлик, дегеле өкмөт бүгүнтөн кордук көргөн бул кыргыз кыздарынын маселесине көңүл бурбаса, эртең кеч болуп калат. Анткени Сапаргүлдүн окуясы далил кылгандай, жазасыз калуу кезектеги оор кылмыштардын уланышына шарт түзөт.

Эльвира Караева,
politika@super.kg