Алманбет Анапияевдин өлүмүнө Жаныш Бакиев жана анын жанындагылар шектелүүдө

Алманбет Анапияевдин өлүмүнө үч адам шектелүүдө. Бул тууралуу бүгүн, 25-февралда Ички иштер министрлиги билдирди.

Маалыматка караганда, окуя болгон күнү Алманбет Анапияевдин жанында болгон Гүлжигит Абилазизов милиция кызматкерлерине 25-февралда көрсөтмө берген.

Абилазизов көрсөтмөсүндө 2-3 ай Алманбет Анапияев менен бирге жашаганын айтып, Анапияев Минск шаарына барганда Айбек аттуу адам 3-4 жолу келип кеткенин билдирген. Андан сырткары Анапияевге 17-февралда Айбек менен кошо толугунан келген, жашы 50лөр чамасындагы, көз айнек тагынган жана башка улуттагы эки адам келген. Алар келгенде Анапияев анын сыртка чыгып туруусун, конокторду өзү тосуп алып жөн гана сүйлөшүп отурарын айткан.  

Алардын чыгуусун таң атканча үйдүн короосунда күткөн Абилазизов: “Айбек түн ичинде бир нече ирет сыртка чыгып, кайра кирип жатты, аны менен кошо келген башка улуттагы адам экөө таң атарда ак материалга бир нерсени ороп чыгып машинага салышты. Кайра кирип кетишип, көз айнекчен киши менен бир сааттан ашык убакыттан кийин чыгып, эшикти кулпулап коюшту. Бир нерсе болгон окшойт деп чочулап, жашынып турган жеримден карасам, ары-бери басышып, акырында эки унааны айдап алышып эки тарапка кетишти. Анан үйгө кирдим. Негизи, Алманбет байке өзү отурган бөлмөнүн эшигин дайыма жаап койчу, мен киргенде бөлмөсүнүн эшиги ачык, свети өчүрүлүү экен. Ашканага кирсем, баары ордунда турат, Алманбет байкенин китеп окуган ордун карасам ал жер деле жок, экинчи кабатка чыксам да жок. Үйдүн ичи таптаза, кан болгон жерди көргөн жокмун. Анан коркуп, "булар мени да бир нерсе кылып кетишет" деп кийимдеримди жыйнап алып, Алманбет байке айлык катары берген миң доллардай акчамды алып такси менен Москвага жөнөдүм. Ал 300 долларга жеткирди. 2 күндөй жаткандан кийин кыргыз өлкөсүндөгү досума телефон чалсам, “Тирүүсүңбү? Сенин сүрөтүң интернетте жүрөт” деди. Анан мен Алманбет Анапияевдин өлүмүнө жок жерден күнөөлүү болуп калбайын деп Бишкекке келдим”,- деди. Көрсөтмө берүүдө ал окуя болгон күнү Анапияевдин өлүмүнө шектүү катары бир канча сүрөттүн ичинен экс-президент Курманбек Бакиевдин бир тууганы Жаныш Бакиевдин, ИИМдин Уюшкан кылмыштуу топко каршы күрөшүү башкармалыгынын мурунку башчысы Айбек Абдразаков жана Жаныш Бакиевдин чечен улутундагы жан сакчысы Рустам Сайдуевдин сүрөтүн көрсөттү. 

Айта кетсек, 18-февраль күнү Минскте белгисиз адамдар тарабынан Алманбет Анапияев өлтүрүлгөн. Ал бир канча берене боюнча айыпталып, эл аралык издөөдө жүргөн. Анын уюшкан кылмыштуу топтун лидери жана "кримавторитет" Камчы Көлбаевдин жакын адамы экени айтылып келет.