Орусияда башка улуттун балдары менен жүргөн кыргыз кыздарды суракка алган "патриоттор" кармалышты

15-февралда Орусияда өздөрүн "патриот" деп эсептегендер дагы эки кыргыз кызын "башка улуттун жигиттери менен кафеде жүрөсүңөр" деп кармашып, cуракка алганы тууралуу видео интернетке тараган. ИИМдин Москвадагы өкүлчүлүгү бул эки кызды суракка алган үч жигит кармалып, Москва полициясына өткөрүлүп берилип, учурда өздөрү сурак берип жатышканын жергиликтүү ММКларга кабарлады.

Буга чейин ИИМдин басма сөз кызматынын өкүлү Эрнис Осмонбаев SUPER.KG'ге "патриоттор" ИИМдин Москва шаарындагы өкүлчүлүгү аркылуу изделип жатканын билдирген эле. Ошондой эле толук маалыматка ээ болуу үчүн эки кыз дагы изделип жатканын кошумчалаган.

"Патриотпуз" дегендерге кыздардын бири бетин видеого тартууга каршы чыкпай, өз оюн айтып берген. Ал эми экинчиси болсо жүзүн жашырууга аракет кылган. Талас облусунан боло турганын айткан кыздар эч кандай туура эмес жолдо эместигин түшүндүрүүгө аракет кылышкан. Балдар кыздарды басынтып камерага тартышып, аларды ары-бери жулкулдатып кыйнашканын көрүүгө болот тасмадан.