Эротикалык кадрлары бар тасмаларга тыюу салуу боюнча мыйзам долбоору коомдук талкууга коюлду

Кыргыз Республикасынын Маданият, маалымат жана туризм министрлиги өлкө аймагында көрсөтүлүп жаткан тасмалардагы порнографияны аныктоо үчүн атайын эксперттик комиссия түзүүнү көздөп жатат. Тийиштүү мыйзам долбоору учурда коомдук талкууга коюлду. Бул тууралуу Кинематография департаментинин расмий сайтында маалымдалат.

Ал эми белгилүү режиссёр Эрнест Абдыжапаров бул демилге тууралуу: "Мындай тыюу салуу кыргыз тасма жаратуучуларына терс таасирин деле тийгизбейт. Анткени биздин режиссёрлор эротикалык кадрлары бар тасмаларды көрүүчүлөргө сунуштабайт", - дейт.

"Элди бузуунун дагы бир жолу - кино. Өткөн жылы "Пятьдесять оттенков серого" тасмасы көрсөтүлө баштаган. Бул ачыктан ачык кыргыз элинин моралдык каада-салтын, менталитетин бузган кино болгондугуна карабай көрсөтүүнү токтотууга биздикилердин алдары жетпей койду. Андыктан кыргыз жергесинде көрсөтүлүп жаткан чет элдик тасмаларга бөгөт коюу максатында ушундай демилге көтөрүлүп жатат. Мындай тыюу салуу кыргыз режиссёрлоруна терс таасирин тийгизбейт. Анткени биздин режиссёрлор эротикалык кадрлары бар тасмаларды көрүүчүлөргө сунуштабайт. Андай тасмаларды эл да кабыл албайт. Тасма аркылуу элди, коомду тарбиялоого, жакшы же жаман жакка өзгөртүүгө болот. Андыктан мен бул демилгени колдойм",- деп билдирди Абдыжапаров.

"Кыргыз тасмасында ачык эпизоддор бар, мисалы, "Аталар керээзи", "Ээнсиреген үй" деген сыяктуу тасмалар. Демек, дагы тартыла берет да?" деген сурообузга режиссёр мындай жооп узатты:

"Бул тасмаларды тарткан режиссёр Нурбек Эген өзү кыргыз болгону менен, чет жерде жашап калган адам. Анын тасмаларынын кыргыз киносуна тиешеси жок. Жогоруда айтылган тасмалар чет өлкөлүк жарандар тарабынан каржыланган. Бирөөнүн тапшырмасы менен тартылган десем да болот. Кыргыздар каржылап тартылган тасмаларда элге жат болгон көрүнүштөр жокко эсе".