Интернет аркылуу калың элге таанылган жаш талант Нурчолпондун тушоо кесүү чыгармачылык кечеси болуп өттү (фоторепортаж)

Бүгүн, 4-июнда "Кыргыз киносу" кинотеатрында буга чейин интернет ааламында ырларын 100 миңден ашуун көрүүчү көрүп, көпчүлүккө таанылып калган жаш, таланттуу ырчы Нурчолпондун тушоо кесүү чыгармачылык кечеси болуп өттү. Ырчынын чыгармачылыгына продюсери болуп жаткан режиссёр Сүйүн Откеев, ырчынын үй-бүлөсү, окуткан мугалимдери жана башкалар күбө болушту. Кечеде алып баруучулук кызматты "тамашоучу" Самат Эркинбек уулу аркалады.

"Чыгармачылыктагы тушоо кесүү кечеме кош келипсиздер! Сиздерге үйдөгүдөй сонун ырдап берүүгө аракет кылам" деген Нурчолпон комуз менен "Келесиңби?" деген ырды аткарды. Андан соң Түгөлбай Казаковдун "Жамгыр төктү" аттуу чыгармасын жана интернетте популярдуу болгон "Солнышко" деген чыгарманы гитара менен ырдады. Жолдубай Кайыповдун "Атам менен энеме", Рыспай Абдыкадыровдун "Издейм сени" чыгармасын аткарды. "Менин жакшы көргөн ырларымдын бири - "Ыр десте" деген жаш талант гитара менен ырдаганда, көрүүчүлөрдүн баары кол чаап колдоп турушту.

Кече соңунда "чыгармачыл жолу кенен болсун, эл сүйгөн, сыйлаган кыздардан болсун" деп Нурчолпонго жакшы каалоо-тилектер айтылып, бата берилди. Келгендердин баары кече эң сонун өткөнүн айтып тарашты.