Ошто өзүн ырчымын деп тааныштырган кыз милициянын кашын жара тепти

Ошто өзүн ырчымын деп тааныштырган кыз милициянын кашын жара тепти. Бул тууралуу бүгүн, 13-январда Ош шаардык ички иштер башкармалыгынан билдиришти.

Маалыматка караганда, окуя 13-январга караган түнү Ош шаарындагы Масалиев жана Абдыкадыров көчөлөрүнүн кесилишинде болгон. Анда Ош ШИИБинин Патрулдук милициясы Хонда Аккорд үлгүсүндөгү унааны токтоткон, бирок айдоочу баш ийбей качып жөнөгөн. Патрулдук милициянын кызматкерлери аркасынан кууп барышып, акыры токтотушкан. Ошол учурда ичинен өзүн журналист, эл тааныган ырчы катары тааныштырган кыз түшүп, ар кимге телефон чалып Патрулдук милициянын кызматкерлерин коркуткан. Кийин унаасын айып жайга токтотуу үчүн алдына отурган Патрулдук милициянын кызматкеринин кашын арткы орундуктан буту менен жара тепкен.

"Ошол учурда кыз мас абалда болгон. "Бейбаштык" беренеси боюнча кылмыш иши козголуп, убактылуу кармоочу жайга киргизилди", - дейт Ош ШИИБинин басма сөз катчысы Замир Сыдыков.

Социалдык тармактарда милициянын кашын жара тепкен кыз Алтынай Жайнакова экени айтылууда. Анын Фейсбуктагы баракчасында "Ош ТВ" телеканалында иштейт деп жазылган. Аталган канал ал кыз болгону стажировкадан өтүп кеткенин билдирди.