Сүрөттөгү арыктыгынан алсыраган нигериялык бала мектепке бара баштады

Ырымчыл ата-энеси көчөгө таштап салгандан кийин даниялык кайрымдуулук уюмунун негиздөөчүсү Аня Ринггрен Ловен тарабынан бир жыл мурда куткарылган нигериялык бала мектепке барды. Бул тууралуу өткөн жумада "The Independent" басылмасы жазып чыкты.

2016-жылдын январь айында алсыз, 2 жашар арык балага суу ичирип жаткан айымдын сүрөтү дүйнөгө тараган. Туугандары сыйкырчылык боюнча айыптап, андан баш тартышкан бала жөнүндө маалымат алгандан кийин Ловен аны жакындары түрдүү ырым-жырымдарга байланыштуу таштап кеткен кичинекей балдар үчүн ачылган баш калкалоочу жайга алып келген.

Ушул жылдын 30-январында Ловен туура бир жыл мурунку көрүнүш менен түшкөн сүрөттү жарыялаган. Анда 12 ай ичинде бир топ өзгөргөн, толуп, чоңоюп калган, кооз кийинип, ийинине баштык асынган баланы көрүүгө болот.

"Бүгүн Хоуп аттуу баланы дүйнө эли тааныгандан тарта бир жыл убакыт өттү. Ушул жумада ал мектепке барат", - деп жазган Ловен.