Чемпиондор Лигасы: “Барселона” “ПСЖга” 6 гол киргизди, дортмунддук “Боруссия” “Бенфиканы” жеңди

Чемпиондор Лигасынын жарым чейрек финалынын жооптук беттештери Барселона жана Дортмунд шаарларында уланды. “Барселона” өз үйүндө “ПСЖга” 6 гол киргизсе, дортмунддук “Боруссия” “Бенфикага” жоопсуз 4 гол киргизди.

"Барселона" (Испания) - "ПСЖ" (Франция) – 6:1

Голдор: Суарес (3-мүнөттө), Кюрзава өз дарбазасына (40-мүнөттө), Месси (50-мүнөттө), Неймар (88-мүнөттө, 90-мүнөттө), Роберто (90+5-мүнөттө) – Кавани (62-мүнөттө)

Биринчи беттештин жыйынтыгы - 0:4

4 гол айырмачылык менен жеңилген “Барселона” өз үйүндө болгон күчүн көрсөттү. Месси-Суарес-Неймар үчилтиги париждик клубдун коргоочуларынын айласын алгачкы мүнөттөрдөн тарта эле кетирип баштады. Коргонууга өткөн “ПСЖ” контр чабуулдарын уюштура албай убара тартып жатты. Жыйынтыгында эсеп 50-мүнөттө 3:0 санына жетти. Бирок Эдинсон Кавани 62-мүнөттө айырмаланып, эми каталондуктар чейрек финалга чыгуусу үчүн дагы 3 гол киргизүүсү керек болду. Бул жолу Неймар оюндун тизгинин колуна алды. Оюндун соңку мүнөттөрүндө “Барселона” көздөгөнүнө жетти. Барселонада майрам. Париж ыйга чөмүлдү.

"Боруссия Д" (Германия) - "Бенфика" (Португалия) – 4:0

Голдор: Обамеянг (4-мүнөттө, 61-мүнөттө, 85-мүнөттө), Пулишич (59-мүнөттө)

Биринчи беттештин жыйынтыгы - 0:1

Дортмунддук клуб өз үйүндө “Бенфикага” бир да мүмкүнчүлүк берген жок. Обамеянг Лиссабондо кетирген жаза басуулары үчүн күйөрмандарынын алдында жооп берди. Ал бул оюнда үч жолу айырмаланды. Арада Кристиан Пулишич 2-таймда гол киргизгенге жетишти. “Боруссия” өз үйүндө кайсы команда болбосун чабуулга ыктап ойной аларын көргөздү. Немис клубу чейрек финалга жолдомо алды.