Эстакадалык көпүрөнүн "шыбагы башына түшүп, эсин жоготту" делген кош бойлуу аял башынан 2 сантиметрдей жаракат алган

Эстакадалык көпүрөнүн "шыбагы башына түшүп, эсин жоготту" делген кош бойлуу аялды жерине барган "Тез жардам" кызматы таппай калган. Бул тууралуу Ош шаарындагы Саламаттыкты сактоо министрлигинин координатору Абды Шамшиев SUPER.KG порталына бүгүн, 9-мартта кабарлады.

"Тез жардам" кызматына чакыруу түшкөн соң 10 мүнөттөн кийин барышкан. Бирок ал жерден жабырлануучуну табышкан эмес. Ошол жердеги тургундардан сурашса, окуя тууралуу айтышыптыр", - деди А.Шамшиев.

Кош бойлуу аял Оштун шаардык ооруканасына кайрылган. Бул тууралуу аталган ооруканадан билдиришти.

"Кечээ, 8-мартта биздин ооруканага башында 2 сантиметрдей жаракаты бар кош бойлуу аял "эстакадалык көпүрөдөн башыма бир нерсе түшүп кетти" деп кайрылган. Алгач ал төрөтканага барып көрүнгөн. Түйүлдүккө эч кандай коркунучу жок экени аныкталганда, биздин травматология борборуна келген. Адистер ага жардам көргөзүшкөн, бирок бейтап андан кийин эле ден соолугу жакшы экенин айтып кетип калган. Аты-жөнүн өзүнүн уруксаты жок айта албайбыз", - дешти ооруканадан.