Ош ШИИБи: Акыркы үч күндө 3 кыз ири өлчөмдөгү дары, уксус ичип өз жанын кыюуга аракеттеништи

Акыркы үч күн аралыгында өз жанын кыйганга аракет кылган 3 факты катталды. Өзүн өзү өлтүрүүгө аракет кылгандардын үчөө тең 20 жаштагы кыздар. Бул тууралуу Ош шаардык ички иштер башкармалыгынын басма сөз кызматы 12-апрелде билдирди.

Маалыматка караганда 9-апрелде Төлөйкан кичи районунун жашоочусу Ж.А. уксус ичип ууланган. 10-апрелде М.К. аттуу кыз өз үйүндө ири өлчөмдөгү дары-дармек ичип алган. Кечээ, 11-апрелде Ош шаарынын Н.Исанов көчөсүндөгү үйлөрдүн биринин жашоочусу Р.С. дагы ири өлчөмдөгү дары-дармек ичип ууланган. Үчөө тең Ош облустук ооруканасынын жандандыруу бөлүмүнө жаткырылды.

Суицидге барган жаштардын саны өсүп жатканын белгилеген Ош ШИИБи жарандарды бул маселеге кайдыгер карабоого чакырды.

"Ош шаарында өз өмүрүнө кол салгандардын саны көбөйүп жатат. Алардын көпчүлүгү өткөөл курактагы кыздар. Жыл башынан бери Ош шаарында 5 адам өз өмүрүн кыйды. Ал эми, 41 адам ѳз өмүрүн дары-дармек же уулуу заттарды ичишип, кыюуга аракет жасашкан. Алар дарыгерлердин жардамы менен өмүрү арачаланып калганы менен, жаштайынан майып болуп калышууда", - деп айтылат маалыматта.