Индияда 8 күчүктү энесинин көзүнчө өлтүргөн аял 5 жылга камалат

Индиянын Кришнагар шаарында 8 күчүктү энесинин көзүнчө өлтүргөн аялга кылмыш иши козголду. Эгерде аялдын айыбы далилденсе, 5 жылга темир тор артына киргизилери жазылат чет элдик маалымат каражаттарында.

Индияда жолбун ит, мышыктардын саны абдан көп. Бийлик жана аларга кайдыгер карабаган жарандар тарабынан атайын жайлар салынып, жаныбарларды коргоо уюмдары ачылганы менен көйгөй толук чечилбей келет. Ошондой жолбун иттердин бири Амма 8 күчүгүн багуудан кыйналып, жергиликтүү жашоочулардын биринин үйүнө жакын келип жайгашкан.

Бирок Амманын үйдүн ээси тамак-аш берип турат деген үмүтүн таш каап, кожойке каардуу жорук жасаган. Ал Амманын көзүнчө ар бир күчүктү таш менен башына чаап, жерге уруп өлтүргөн. Муну көргөн Амма аны токтотууга аракет кылган, жансыз жаткан ар бир күчүктү жыттап көрүп, тирүүсүн таба алган эмес.

Ал эми каардуу аял "муну итке сабак болсун, экинчи менин короомо келбесин деген таризде жасагам" деп актанууда.