"Эль-Классико": "Реал Мадрид" өз үйүндө "Барселонага" утулуп калды

Футбол боюнча Испания чемпиондугунун 33-турунда мадриддик "Реал" өз үйүндө "Барселонаны" кабыл алып, 2:3 эсеби менен утулуп калды.

Биринчи голду оюндун 28-мүнөтүндө "Реал Мадриддин" жарым коргоочусу Каземиро киргизди. 5 мүнөттөн кийин каталониялык клубдун лидери Леонель Месси эсепти теңеди. Ошентип 1-тайм 1:1 эсеп менен аяктады. Оюндун кызыгы 2-таймдын экинчи бөлүгүндө болду. 73-мүнөттө "Барселонанын" футболчусу Иван Ракитич гол киргизип, командасын алдыга чыгарды. 77-мүнөттө "Реал" азчылыкта калды: Мессиге каршы орой оюн алып барганы үчүн коргоочу Серхио Рамоско кызыл айып кагаз көрсөтүлдү. Буга карабастан 85-мүнөттө мадриддик клуб оюн эсебин теңей алды: голдун автору Хамес Родригес болду. Ал эми оюндун акыркы мүнөтүндө Месси киргизген гол чечүүчү болду. Оюн 2:3 эсеп менен аяктап, "Барселона" "Реал Мадридди" жеңди. Ошентип "Барселона" 75 упай топтоп, чемпиондукта 1-орунга көтөрүлдү. Бирок "Реалда" 1 оюн запаста бар.

Айта кетсек, Испания чемпиондугу 38 турдан турат.