Кирпич заводунда иштеген абактагылар 4-5 миң сом айлык табышат

“Абакта жаткандарды жумушка тартканга аракет кылып жатабыз”, - деп бүгүн, 3-майда парламентте Жаза аткаруу мамлекеттик кызматынын төрагасы Таалайбек Жапаров билдирди.

Анын айтымында, 2 кирпич заводу ачылып, 200 миңден ашык абакта жаткандар иштешет. Ал билдиргендей, заводдон 4-5 миң сомдой айлык маяна алып, карыздарын же үй-бүлөсүн багат. “Анткени соттолгон адам шарттуу түрдө мөөнөтүнөн мурда чыгып кетсе, карызын төлөбөй чыкты деп кайрылгандар бар. Жаза аткаруу мамлекеттик кызматын күнөөлөп келгендер болот. Ошондуктан абактагыларды жумуш менен камсыз кылып, карыздарын төлөгөнгө мүмкүнчүлүк түзүп берүү керек”, - деди ал.

“Ата Мекен” фракциясынын депутаты Аида Салянова келтирилген зыянды төлөгөндөн кийин абактан чыгуу туура ой экенин айтып, жарым жартылай калбоо керек деген пикирин билдирди.

Жогорку Кеңештин жыйынында “Кыргыз Республикасынын айрым мыйзам актыларына, Кылмыш-жаза кодексине жана Жазык-аткаруу кодексине өзгөртүүлөрдү киргизүү жөнүндө” мыйзам долбоору үчүнчү окууда добуш берүүгө жөнөтүлдү. Анда мөөнөтүнөн мурда бошотууда соттолгон адам тарабынан келтирилген материалдык зыянды төлөп берүү бөлүнгүс шарт болорун аныктоо сунушталып жатат.