"Ак Кеме" мейманканасын курчоого алууда бир кызматкердин кан басымы жогорулап, "Тез жардам" алып кетти

Бүгүн, 22-июнда эртең мененки саат 07:00 чамасында милиция кызматкерлери тарабынан курчоого алынган "Ак Кеме" мейманканасы учурда дагы укук коргоо кызматкерлеринин жана Мамлекеттик мүлктү башкаруу фондунун кызматкерлеринин көзөмөлүндө. Эртең менен имараттын эшиктери ичинен бекитилүү болгондуктан милиция кызматкерлери эшиктерин сындырып, айнектерин талкалап киришкен. Ошол учурда мейманкананын күзөтчүлөрүнүн башчысы болуп иштеген Сражидин Ормонов аттуу кызматкерди "Тез жардам" кызматы алып кетти. Анын кан басымы жогорулап, жүрөк оорусу козголушу мүмкүн дешүүдө. Ал ооруканалардын бириндеги кардиология бөлүмүнө жеткирилгенин кесиптештери кабарлашты.
Сүймөнкул Орозобеков "Ак Кеме" мейманканасынын кызматкери:
"Эртең менен саат 07:00дө жумушка келсем милиция кызматкерлери курчап калыптыр. Мени киргизишкен жок. Саат 07:30дарда "Тез жардам" кызматынын унаасы келип короонун ичинен күзөт башчысы Сражидин байкени алып кетти. Ал өзү кан басымы жогору болчу. Эртең менен Маммүлк кызматы менен милиция келип күзөт башчы калып, башкаңар чыккыла дептир. Ошондо эле анын кан басымы көтөрүлүп, жүрөк оорусу кармап калыптыр. Ал азыр ооруканада жандандыруу бөлүмүндө жатат деп угуп жатабыз".

Атын атагысы келбеген "Ак Кеменин" кызматкери окуя тууралуу айтып берди: "Эртең менен саат 05:00дөн өткөндө милиция кызматкерлери келишкен. Короону сыртынан кайтарган күзөтчү аларга дарбазаны ачпай койгондо, милициялар короодон ашып өтүп дарбазаны өздөрү эле ачып кирип келишти. Мейманканада түнкү күзөттөгүлөр, официанттар, ашпозчулар болушкан. Көп сандагы милициялар короого бастырып киришкенде, күзөтчүлөр чочулап имараттын башкы эшигин да ичинен бекитип алышкан. Бирок ага карабай эле милиция эшикти талкалап ичкериге киришти. Биз мейманкананын жетекчилерине телефон чалып кабарладык. Кийин баарыбызды сыртка чыгарып салышты".