Жабырлануучу: "Эки жылда кумар оюндарынан 60 миң доллар уттуруп жибердим"

Бишкек шаарында кумар жайлары мыйзамга карабай азыр дагы иш алып барып жатканын айтып жабырлануучулар, "Сезим" кризистик борборунун жетекчиси Бүбүсара Рыскулова жана жарандык активист Баястан Келишбеков бүгүн, 3-августта маалымат жыйынын өткөрүштү.

Анда жабырлануучулардын бири: "Эки жылда кумар оюндарын ойноп жүрүп, 60 миң доллар уттуруп жибердим. Кумар жайларга баргандан кийин азгырылып экинчи жолу дагы барасың. Биринчи күнү 7 миң сом утуп алсаң кийинки барганда андан эки эсе көп акчага утулуп калышың мүмкүн. Бийлик өкүлдөрүнөн өлкөдөгү бардык кумар оюндары ойнолуучу жайларды жаап берүүсүн өтүнөм, инилеримдин дагы кумар оюндарына азгырылып кетишин каалабайм", - деди.

"Биздин борборго акыркы учурда ата-энелер көп кайрылып, балдарын кумар оюндарынан сактап калуубузду өтүнүп жатышат. Кумар оюндары өлүмгө жана башка жаман иштерге алып барууда", - деди Бүбүсара Рыскулова.

Белгилей кетсек, 2011-жылдын 1-ноябрында кумар оюндарын ойнотуучу жайлардын ишмердүүлүгүнө тыюу салган мыйзам кабыл алынган. Ал эми 2017-жылдын 13-майында президент Алмазбек Атамбаев "Лотереялар жөнүндө" мыйзамга кол коюп, ал бир айдан кийин күчүнө кирген. Ага ылайык, лотереялык ишмердүүлүктү жүргүзүүгө берилген уруксат кагаздары жокко чыгарылмак.