Алия Шагиева баланы кантип туура уктатуу керектиги жөнүндө апаларга кеңеш берди

Президенттин кызы Алия Шагиева жаш апаларга баланы кантип уктатуу керектиги жана аларга кандай мамиле кылуу керек экендиги жөнүндө апаларга кеңеш берди. Ал социалдык тармактагы баракчасына видео жүктөп, анда кадр артында кеңештерин айтып берген.

"Наристелер физикалык жактан өнүгө элек болсо да, сезимталдыгы баарыбыздыкынан жогору турат"

"Биздин үйрөнүшүбүз керек болгон эң башкы нерсе - коопсуздукту тартуулаган сезим, ишенимдүүлүк. Сиз маанайыңыз жок болуп, балаңызга бактылуу көрүнүүгө аракет кылсаңыз дагы ал баарын сезет. Үнүңүздөн, жүзүңүздөн. Наристе дайыма сиздин ички сезимдериңизди түшүнүп турат. Балаңыздын кайсы учурларда ыйлаганын байкап көрүңүз. Анын жалаягын алмаштыруу керек болгондо, уйкусу келгенде же ачка болгондо гана ыйлаганына күбө болосуз. Алардын физикалык денеси өнүгө элек болсо да, сезимталдыгы баарыбыздыкынан жогору турат", - дейт Алия Шагиева.

Андан сырткары ал баланы уктатуу боюнча мастер-классын көрсөтүп, төмөндөгүлөрдү айткан.

"Алгач чоң жаздыкты тандап алыңыз. Баланын колдорун ороп, буттарын эркин калтырыңыз. Ал каршылыгын көрсөтөт, бул учурда жана мен айткан ишенимдүүлүк сезимин эстеңиз, өзүңүздү токтоо кармаңыз. Баланы алаканыңыз менен бутуна же колдоруна ритм менен оорутпай таптаганыңыз ага ишенимдүү колдордо жатканы тууралуу маалымат берет. Эгерде балаңыз көпкө чейин уктабай жатса, аны кызыктуу нерсе менен алектендириңиз. Белгилүү бир убакыттан кийин эстеп баштайт. Кээде ал ачка болгондугу үчүн көпкө чейин уктабай коюусу мүмкүн. Анда сиз башын жаздыктан көтөрбөй туруп эмизиңиз. Өзүңүздөрдү сүйүп, бактылуу болуңуздар! Кыргыз калкына ыраазычылыгымды билдиргим келет".