Бишкек шаардык мэриясы: "Коомдук транспортто жол киренин баасы кымбаттабайт"

Бишкек шаарынын мэриясы элдин кайрылуусунан улам коомдук транспортко жол кирени көтөрүү маселесин карап чыгууну күн тартибинен алды. Бул тууралуу бүгүн, 2-октябрда Бишкек шаардык мэриясынын басма сөз кызматы билдирди.

"Жагымдуу шарттар шаары" аттуу 2017-2020-жылдарга карата Бишкек шаарынын социалдык-экономикалык өнүктүрүү программасы шаардык транспортторго эффективдүү тариф саясатын түзүү боюнча иш-чараларды жүргүзүүнү пландаган. Жол кирени көтөрүү коомдук транспорттордун иштөө сапатын жакшыртуу, шаар тургундарынын социалдык абалын эске алуу менен гана ишке ашуусу керек экенин мэрия жакшы түшүнөт", - деп жазылат маалыматта.

Эскерте кетсек, өткөн жумада болгон маалымат жыйынында шаар башчысы Албек Ибраимов коомдук транспорт чыгымын актабай жатканын айтып, жол кире 12 сомго көтөрүлүшү мүмкүн экенин билдирген.