Өмүрбек Текебаев мамлекеттик жактоочудан баш тартып, себебин түшүндүрдү

Бүгүн, 2-октябрда Жогорку Кеңештин депутаты Өмүрбек Текебаев менен экс-элчи Дүйшөнкул Чотоновдун иши боюнча сот отуруму өтүүдө.

Отурумга жактоочулар Канат Хасанов менен Чынара Жакупбекованын келбей калгандыгына байланыштуу сот Текебаевге мамлекеттик жактоочу Элвира Чоноеваны дайындады. Бирок Текебаев мамлекеттик жактоочудан баш тартты.

"Конституцияга "багары жок жакырларга мамлекеттен акысыз жактоочу берилсин" деген норманы мен киргизгем. Бүгүн мен акча бербесем да, мага жактоочу болом дегендер ондоп саналат. Мага мени эмес, прокуратуранын кызыкчылыгын коргогон жактоочунун кереги жок. Мен өзүмдүн жактоочуларым жок иштебейм. Мени сыртка чыгаргыла", - деди Текебаев.

Соттук жамааттын төрагасы: "Сиздин кылмыш ишиңиз оор болгондуктан, мамлекет тарабынан жактоочу берилет. Ишти улантабыз", - деди сот.

Бирок Өмүрбек Текебаев менен Дүйшөнкул Чотонов сот залынан сыртка чыгарылып кетти.

"Ата Мекен" партиясынан билдиришкендей, жактоочу Канат Хасанов Бишкекте эмес, ал эми Чынара Жакупбекова баласы ооруп калып, сотко келе алган эмес.