Депутат Канат Исаевдин 200гө чукул тарапташтары соттун алдына чогулушту (фото)

Бүгүн, 2-октябрда Бишкек шаарынын Биринчи Май райондук сотунда Жогорку Кеңештин депутаты Канат Исаевдин баш коргоо чарасы каралат. Буга байланыштуу соттун имаратынын алдына анын тарапташтары чогулушууда. Учурда 200гө чукул адам Исаевди боштондукка чыгаруу талабын айтышууда.

Алдын ала маалыматтар боюнча, учурда Канат Исаев соттун имаратынын ичинде. Милиция кызматкерлери соттун имаратынын айланасын курчоого алып, журналисттерди жана Исаевдин тарапташтарын киргизбей жатышат.

Сотко Жогорку Кеңештин оппозициялык "Республика-Ата Журт" фракциясынан депутаттар Алтынай Өмүрбекова, Мирлан Жээнчороев келишкени белгилүү болду.

Эскерте кетсек, депутат Канат Исаев массалык баш аламандык уюштуруу, кылмышка даярдануу жана бийликти күч менен басып алууга даярдык көрүү боюнча Башкы прокуратура тарабынан козголгон кылмыш ишинин алкагында 30-сентябрь күнү кармалган. Кечээ, 1-октябрда депутат 48 саатка камакка алынган болчу.