Бишкек мэриясы Чүй жана Манас проспектилеринин кесилишиндеги жер алдындагы өтмөктөн жамгыр жааганда суу тамчылаганы боюнча билдирүү таратты

Бишкек мэриясы Чүй жана Манас проспектилеринин кесилишиндеги жер алдындагы өтмөктөн жамгыр жааганда сарыгып суу тамчылап жатканы боюнча билдирүү таратты.

Маалыматка караганда, Капиталдык курулуш башкармалыгы жаңыдан курулушу бүткөн өтмөктөрдөн жамгырдан кийин суу өтүп жатканын иликтеп чыгып, ага гидроизоляциялык катмардын бузулушу себеп болгонун аныкташкан.

Курулушту ишке ашырып жаткан "Главтехинвест" компаниясы мэрияга реконструкцияланган жер алдындагы өтмөктү толук өткөрүп бере элек. Мындан улам кетирилген кемчиликтер кайрадан компаниянын эсебинен оңдолору айтылды.

Айта кетсек, 29-сентябрда Бишкек шаарынын Манас-Чүй кең көчөсүнүн кесилишине курулган жер өтмөктөн сарыгып аккан суу тамчылап, суу тамчылаган жерден бетондун шыбактары сыйрылып түшүп жаткан. Жер өтмөк ушул жылдын 11-сентябрында ачылып, кызыл тасмасы кесилген. Оңдоо иштерине 27 миллион 800 миң сом сарпталганы айтылган.