Текебаевдин жактоочулары Жогорку Сотко арызданышат

Кечээ, 2-октябрда Бишкек шаардык соту депутат Өмүрбек Текебаев менен экс-элчи Дүйшөнкул Чотоновго карата Биринчи Май райондук сотунун өкүмүн күчүндө калтырган. Жактоочулары шаардык соттун чечимин жокко чыгаруу өтүнүчү менен Жогорку Сотко кайрылышат. Бул тууралуу "Ата Мекен" партиясынын катчылыгынан SUPER.KG'ге кабарлашты.

"Жогорку Сотко доо арыз берүү боюнча маселе бүгүн чечилет. Шаардык соттун чечими 10 жумушчу күндүн ичинде күчүнө киргенче биз доо арыз беребиз, убакыт бар", - дешти партиядан.

Эскерте кетсек, 16-августта Биринчи Май райондук соту Текебаев менен Чотоновду 8 жылга эркинен ажыратып, мүлкүн мамлекетке чегерүү жана бошотулгандан кийин үч жыл мамлекеттик кызматта иштебөө тууралуу өкүм кабыл алган. Бирок Башкы прокуратура райондук соттун өкүмүнө макул болбой, соттолуучулардын абакта өтөөчү жаза мөөнөтүн узартып берүүсүн сурап, Бишкек шаардык сотко апелляциялык арыз менен кайрылган.