2 миллион долларлык бюстгальтер, моделдин подиумда жыгылганы. Көп кызыктар коштолгон "Victoria's Secret Show 2017" ич кийимдер көргөзмөсү Кытайда өттү

Мода дүйнөсүндөгү эң негизги жана масштабдуу иш-чаралардын бири болуп эсептелген "Victoria's Secret Show 2017" мода көргөзмөсү кечээ, 20-ноябрда Кытайда болуп өттү.

Чет элдик басылмалардын маалыматына ылайык, Кытайдын Шанхай шаарында өткөн мода көргөзмөсүнө дүйнө жүзүнүн көптөгөн өлкөлөрүнөн көрүүчүлөр келишкен. Ич кийимдерди чыгарган бренддин тарыхында эң масштабдуу деңгээлде уюштурулган бул көргөзмө "Mercedes-Benz Arena" стадионунда, 18 миң көрүүчүнүн катышуусунда өттү.

Кеченин көрүүчүлөрү көптөгөн кызыктуу окуяларга күбө болушту. Алардын бири - баасы 2 миллион долларды түзгөн бюстгальтер болду. Ал бриллиант, сапфир асыл таштары менен кооздолуп, негизинен алтындан жасалган. Мындай аземделген ич кийим 27 жаштагы бразилиялык топ-модель Лаис Рибейронун шыбагасына туш келип, подиумга кийип чыкты.

Ич кийимдер көргөзмөсү жагымсыз жаңылыктар менен да коштолду. Иш-чарага 3 күн калганда украиналык модель Дарья Хлистунга Кытай элчилиги виза берүүдөн баш тарткан. Ушундай эле окуяга орусиялык моделдер да кабылышкан. Сулууларга виза эмне себептен берилбей калгандыгы азырынча маалымдала элек.

Украиналык модель Дарья Хлистун

Кеченин коноктору күтүлбөгөн окуяга да туш болушту. Кооз ич кийим менен айкалышкан бийиктиги 15 сантиметрлик такалуу бут кийим кийип подиумга кытайлык модель Минс Си чыкты. Көпчүлүк суктанган көздөрү менен моделди узатып бара жатканда Минс күтүүсүздөн жыгылып кеткен. Анын бул абалдан чыгуусуна кесиптеши жардам көрсөтүп тургузуп, шоу кайрадан уланды.

Келген коноктор "Victoria's Secret`тин" көргөзмөдөн кийинки атайын уюштурулган кечесине да күбө болушту. Анда бренддин атайын моделдери денесин жашырбаган көйнөктөрдү кийип барышып, көпчүлүктү "суктандырган".