Тышкы иштер министрлиги Иерусалим шаарынын айланасында болуп жаткан абал боюнча тынчсызданып жатканын билдирди

Бүгүн, 8-декабрь күнү Кыргыз Республикасынын Тышкы иштер министрлиги Иерусалим шаарынын укуктук жана тарыхый статусунун айланасында болуп жаткан абал боюнча билдирүү таратты. Министрликтин билдирүүсүндө, аталган шаардагы абал палестин-израиль жаңжалын бир калыпка келтирүүгө терс таасирин тийгизери, ошондой эле Жакынкы Чыгыштагы чыңалып турган абалды курчутары айтылган.

"Кыргыз өлкөсү дүйнө коомчулугунун биргелешкен аракети, палестин-израиль жаңжалын эл аралык укуктун нормалары жана принциптеринин негизинде жөнгө салынарына үмүт артат", - деп айтылат маалыматта.

Айта кетсек, ушул жылдын 6-декабрь күнү АКШнын президенти Дональд Трамп Израилдин борбору Иерусалим экенин расмий жар салган. Ошондой эле ал Тель-Авив шаарындагы АКШнын элчилиги Иерусалимге көчүрүлөрүн билдирген. Трамптын билдирүүсү бир катар мусулман өлкөлөрүндө нааразычылыктарды пайда кылган.