Бүгүн саат 15:00дө SUPER.KG'нин Түз эфиринде ырчы Омар конокто болот

Бири-бирине удаалаш кош жакшылыктар жашоосунан орун алган ырчы мырза Омар SUPER.KG порталынын кезектеги коногу болот. Ал Казакстандын Алматы шаарында болуп өткөн "Silk Way Star" эл аралык ыр сынагына Кыргыздын атынан катышып 1-орунга ээ болуп, жалпы күйөрмандарына кубаныч тартуулады. Ал эми 2-декабрда ал Диана аттуу бийкечке баш кошуп, жакындары менен жакшылыгын белгилеген.

Омар 2008-жылы «Жаӊы толкун» эл аралык сынагында Алла Пугачёванын колунан «Алтын жылдыз» сыйлыгын алып, ырчы катары калыӊ элдин назарына түшкөн. 2011-жылы «Жылдын супер ырчы мырзасы» наамын алган.

Өзгөчө хитке айланган "Кош жүрөк", "Кыргызстаным", "Жан тумарым" аттуу ырлары анын күйөрмандарынын санынын өсүшүнө жана кыргыз шоу-бизнес чөйрөсүндө өз ордун табууга өбөлгө болду.

Омар эски ырларды жаңы өңүттө ырдап чыгуу жагынан да мыктылыгын "Энекем", "Булбулум", "Күлгүн жаш" жана башка ырларды аткарып далилдей алды.

Ал тынымсыз аракеттин үстүндө жүрүп, 2009-жылы англис тилин тереңдеп үйрөнүү максатында АКШга кеткен. Ал жактан кайткандан кийин кайрадан чыгармачылыкка кызуу киришкен.

Ырчы мырза 1988-жылы Бишкек шаарында төрөлгөн. Өзүнөн улуу бир эжеси бар. Анын улуу агасы кичинекей чагында чарчап калгандыктан чоң атасы Омар төрөлгөндө өмүрү узун болсун деген тилек менен Өмүрбек деген ысым ыйгарган. Ырчы катары Омар деп таанылганы менен үй-бүлөсү, жакындары аны азан чакырылып коюлган атынан аташат.

2015-жылы 27-июль күнү Омар Талас шаарынан алдамчылыкка шектүү катары кармалган. Көп өтпөй ага карата козголгон кылмыш иши токтотулган. Ырчы мырза "Супер-Инфого" берген маегинде адамдарга жасаган жакшылыгы далысына бычак болуп сайылганын айткан. Ошондой эле ал бул жалаадан кийин турмуштан чоң сабак алгандыгын кошумчалаган.

Тынымсыз изденүүнүн үстүндө жүрүп, башкалардан өзгөчө ыр, клиптерди жаратып келген Омардын соңку жеңиши, үй-бүлөсү, кыргыз маданиятына болгон көз карашы, чыгармачылык жолу, келечек пландары тууралуу сиз кызыккан суроолор болсо мүмкүнчүлүктү колдон чыгарбаңыз.

Сиздин суроолор +996 557 75 63 63 WhatsApp номери аркылуу кабыл алынат. Ырчы мырза суроолорго бүгүн, 20-декабрда саат 15:00дөн баштап түз эфир учурунда жооп берет. Ошондой эле түз эфир жүрүп жатканда "Соңку кабар" аркылуу комментарий жазып дагы жооп алсаңыздар болот.