Депутат: "Эгемендүүлүктү алгандан бери биздин балдардын өрчүүсү башкалардан артта калууда"

Жогорку Кеңештин тармактык комитетинин жыйынында наристелердин өнүгүүсү боюнча маселе каралды. Тактап айтканда, төрөлгөндөн 3 жашка чейинки балдардын өнүгүүсүн алдыга жылдыруу базалык стандарты жана 7 жашка чейинки баланын өнүгүү күндөлүгү жөнүндө мыйзам долбоору сунушталды. Анда наристе 3 жашка толгонго чейин эне менен баланы колдоо үчүн атайын күндөлүк китепчелерди таратуу сунушталат.

“ЮНИСЕФтин маалыматы боюнча, эгемендүүлүк алгандан бери биздин балдар бардык жактан башка мамлекеттерден артта калууда. Иликтөөлөрдө салмагы, аң сезими, бардык өрчүүлөрү артта калганы байкалган. Биринчи үч жашка чейин баланын тамак-ашы жакшы болушу керек. Балага көңүл буруу келечекте жакшы жыйынтык берет. Ошондуктан "стандарт жана балдар күндөлүгүн киргизүү маанилүү”, - деди депутат Алмаз Токторов.

"Балдарга төрөлгөндөн баштап үч жашка чейин өсүп-өрчүшүнө көңүл буруу адамдык капиталдын жана кедейчиликти жоюунун маанилүү стратегиясы. Кыргыз өлкөсүндө 2 миллиондон ашык балдар бар. Бул калктын орточо 40 пайызын түзөт. Жаш балдарга каражат салуу келечекте 7 эсе кайтарымы менен киреше алып келет. Ошондуктан балдарды өнүктүрүүгө инвестиция салууга чакырам. Балдар менен, алардын үй-бүлөлөрү менен иштөө маанилүү. Биз өкмөттөн балдар үчүн стандарттуу күндөлүктөргө каражат бөлүп берүүсүн суранабыз”, - деди ЮНИСЕФ Балдар фондунун башчысы Юкиэ Мокуо.

Депутаттар бул демилгени биринчи окууда колдоду.