Сапар Исаков: "Кыргыз өлкөсү супер технология менен жасалган 350 жаңы автобусту Орусиядан сатып алат"

"Кыргыз өлкөсү 350 жаңы автобусту Орусиядан сатып алат", - деди бүгүн, 25-декабрда өкмөт башчы Сапар Исаков журналисттердин суроосуна жооп берип жатып.

"Бүгүн меморандумга кол коюлду. Бул жардам иретинде 12 пайыздык үстөк насыя менен 50 миллион доллар өлчөмүндө 7 жылга берилип жатат. Насыя Социалдык фонд жана Бишкек шаардык мэриясынын баалуу кагаздарынын жана "Газпромбанктын" эсебинен берилүүдө. Бардык шарты бар, ыңгайлуулугу жана сапаты жагынан абдан жакшы иштелген супер технология менен жасалган жаңы автобустар Орусиядан алынып келет. Бул "Таза Коомдун" алкагында жасалууда. Төлөм электрондук карточка менен жүргүзүлөт", - деди Исаков.

Ал эми Бишкек шаарынын мэри Албек Ибраимов чоң шаарлардын тажрыйбасын эске алуу менен борбордогу жүргүнчүлөрдү ташуучу транспорттордун баарын автобустарга жана троллейбустарга айландыруунун үстүндө иштеп жатканын айтты.

"Бул маселеде чоң шаарлардын тажрыйбасынан алып карап, аны өзүбүздүн шаарга алып келгени жатабыз. Автобуска буюртма берип жатканда анын бардык шарттарын эске алабыз. Азыр борбордогу автобустар жүрө турган көчөлөрдү оңдоп-түзөө иштери жүрүүдө. Жаңы келе турган 350 автобус 11 маршрутту камсыз кылат. Бишкек шаарын жалпы камсыз кылуу үчүн 500дөн 700гө чейин автобустар керектелет", - деди Ибраимов.

Белгилей кетсек, 25-декабрда Бишкек шаарына зарыл болгон автобустарды алып келүүнү каржылоону уюштуруу боюнча меморандумга кол коюлду. Меморандумга Бишкек шаарынын мэри Албек Ибраимов, "Газпром Кыргызстан" ишканасынын башкы директору Болот Абилдаев, "Газпромбанктын" төрагасынын орун басары Зауэр Дмитрий, социалдык фонддун төрагасы Теңизбек Абжапаров кол коюшту.

.