Сапар Исаков Жалал-Абад облусунун студенттери менен жолукту

Бүгүн, 26-декабрда премьер-министр Сапар Исаков Жалал-Абад облусуна болгон иш сапарынын алкагында Жалал-Абад мамлекеттик университетине барды. Бул тууралуу өкмөттүн басма сөз кызматы билдирди.

Маалыматка ылайык, өкмөт башчы окуу аудиторияларды кыдырып көрүп, жогорку окуу жайдын факультеттеринин илимий жана ойлоп табуучу ишмердүүлүгү менен таанышты.

Университеттин ректору Кеңеш Үсөнов жогорку окуу жайды өнүктүрүү боюнча келечек чаралар тууралуу маалымат берди. Анын айтымында, бүгүнкү күндө университетте ар кыл багыттар боюнча базалык жана толук жогорку билимдүү көп тармактуу адистерди даярдоо жүрүүдө.

Андан соң Сапар Исаков Жалал-Абад мамлекеттик университетинин студенттери менен жолугушуу өткөрдү.

Студенттердин суроосуна жооп берүүдө Сапар Исаков белгилегендей, бүгүнкү күндө өкмөт тарабынан “Таза коом” улуттук долбоорун ишке ашыруу активдүү жүрүүдө. Анын айтымында, бул республикалык бюджеттин киреше бөлүгүн жогорулатууга жана өлкөнүн социалдык тармагын каржылоо көлөмүн арттырууга мүмкүндүк берет. Ошондой эле премьер-министр “Таза суу” долбоорун ишке ашыруу менен катар ирригациялык долбоорлор жана 2019-жылга карай өкмөттүн ишин толук санариптештирүү боюнча пландар тууралуу айтып берди.

Мындан тышкары, Сапар Исаков белгилегендей, “Жаңы доорго кырк кадам” өкмөттүк программасында өлкө аймактарын тегиз өнүктүрүү үчүн биринчи кезектеги чаралар аныкталган.

“Биз өлкөнүн бардык тармактарында санариптештирүүнү киргизүүбүз зарыл. Мындан тышкары биз республиканын таяныч шаарларын өнүктүрөбүз жана шаардык инфраструктураны жакшыртуу үстүндө ишибизди улантабыз. Алардын катарына Жалал-Абад шаары да кирет”, - деди Сапар Исаков.

Буга катар өкмөт башчы жаш, кесипкөй кадрларды даярдоо жана аларды өлкө аймактарынын медициналык мекемелерине тартуу зарылдыгын белгиледи.

Жолугушуунун соңунда тийиштүү мамлекеттик органдарга айтылган маселелер боюнча тапшырмалар берилди.