Өлкөдөгү катуу суук күндөрү мектептерде окутуу токтотулгандыктан жазгы каникул кыскартылат

Бүгүн, 8-февралда Билим берүү жана илим министрлиги кышкы суукка байланыштуу мектептерде токтотулган окуу процесси кандай толуктала турганын жарыялады. Аталган мекемеден SUPER.KG порталына маалымдалгандай, окуучулардын суук күндөрдө окубай калган окуу сааттары жаз айларында толукталат.

Беш күндүк окуу жумасы менен окуткан мектептерде окуучулар 21-марттан 30-мартка чейин жазгы эс алууга чыгышат. Үзгүлтүккө учураган окуу программалары ишемби күндөрдүн эсебинен март айында толукталат. Тактап айтканда, 5 күндүк окуу жүргүзүлгөн мектептер март айында каникулга чейин ишемби күндөрү да окуп, кышкы эс алуудагы сабактар толукталат.

Алты күндүк окуу жумасы менен окуткан мектептерде окуучулар 26-марттан 30-мартка чейин жазгы эс алууга чыгышат. Окуу сааттар 26-мартка чейин толукталат. Тактап айтканда, жазгы каникулга 5 күнгө кеч чыгат.

Эске салсак, катуу суукка байланыштуу окуучулар 26-январдан 3-февралга чейин эс алышкан.