Тажикстан чек арадагы бекеттерди ачып, чек арачылары Максат-Кулунду көпүрөсүнөн кетишти

Кыргыз мамлекети менен Тажикстандын чек арасындагы "Кулунду" жана "Кайрагач" өткөрүү бекеттери ачылды. Бул тууралуу SUPER.KG'ге Мамлекеттик чек ара кызматынан кабарлашты. Мекеменин басма сөз кызматынын өкүлү Гүлмира Бөрүбаеванын айтымында, учурда чек арадагы абал туруктуу.

"Эки тараптуу сүйлөшүү жыйынтыкталып, эки өткөрүү бекеттери ачылып, бекеттер штаттык режимде иштеп жатат. Ошондой эле Тажикстандын чек арачылары тосуп турган Максат-Кулунду көпүрөсү да ачылып, унаалар эки тараптуу каттай баштады. Учурда абал туруктуу", - деди Бөрүбаева.

Белгилей кетсек, бүгүн, 8-февралда Тажикстан "Кулунду" жана "Кайрагач" өткөрүү бекеттеринен адамдардын, унаалардын өтүүсүнө тыюу салган. Ошондой эле Тажикстан Лейлек районундагы Сай аймагындагы көпүрөгө өтө турган жолду жаап, чек арачылардын санын көбөйткөнү маалым болгон.