Орусиянын ТИМи "Сирияда жүздөгөн орус жарандары каза болду" деген маалыматты төгүндөдү

Орусиянын Тышкы иштер министрлигинин расмий өкүлү Мария Захарова "Сириядагы куралдуу салгылашууда жүздөгөн орус жарандары өлдү" деген маалымат чындыкка дал келбей турганын айтты. Бул тууралуу чет элдик маалымат булактары жазышты.

Захарованын айтымында, Сириянын Дейр-эз-Зор аймагында 7-февралдагы салгылашууда Орусиянын беш жараны каза болушу мүмкүн. "Алар аскерлер эмес, согуштук талаада кандай максатта жүргөнүн иликтөө зарыл", - деди Захарова.

Орусиянын ТИМи 7-февралдагы куралдуу салгылашуу боюнча биринчи жолу кечээ, 15-февралда үн катты. Захарова адам өлүмүнө байланыштуу жалган маалыматтардын тарашына АКШнын маалымат каражаттарын жана орусиялык оппозицияны айыптады. Ал Сириядагы жаңжалдуу аймактарда Орус жарандарынын бар экенин моюндап, алардын орус аскердик күчтөрүнө тиешеси жоктугун айткан.

Белгилей кетсек, 7-февралдан кийин бир канча чет элдик маалымат каражаттары өздүк булактарына таянып, Сириядагы салгылашууда АКШ жетекчилик кылган коалициялык күчтөрдүн аба соккусунан 100гө чукул Орус жарандары каза болгонун жазышкан.