Иранда жүргүнчү ташыган учак кулап, ичиндеги 66 адамдын баары каза болду

Бүгүн, 18-февралда Иран өлкөсүндө жүргүнчү ташыган учак 66 жаран менен кулап, жүргүнчүлөрдүн баары жана борттун 6 кызматкери каза болду. Бул тууралуу чет элдик басылмалар жазып чыгышты.

Маалыматка караганда, учак ирандык "Aseman Airlines" авиакомпаниясына караштуу болгон.

"Аталган авиакомпаниянын учагы Тегеран-Ясуж каттамы боюнча багыт алып, Семиром шаарынын айланасына кулап түшкөн. Учактын ичиндеги 60 жүргүнчү, анын бирөөсү жаш бала жана учактын 6 кызматкери кырсыктан каза болгон", - деп жазылат маалыматта.

Айта кетсек, "Aseman Airlines" авиакомпаниясынын учагы абага көтөрүлүп, учуп бара жатып 50 мүнөттөн кийин радардан жоголуп кеткен. Учак Дена тоо кыркасына кулаган. Расмий маалыматка ылайык, учак 20 жыл мурун чыгарылган.

Учурда Тышкы иштер министрлиги кырсыкка учураган учакта Кыргыз жарандары бар же жоктугун тактап жатат.