Сапар Исаков сырттан келген каражаттарды өздөштүрө албайсыңар деп төрт министрге сөгүш жарыялады

Бүгүн, 22-февралда өкмөттүн жыйынында премьер-министр Сапар Исаков сырттан келген каражаттарды өздөштүрө албаганы үчүн бир канча министрлерге жана жетекчилерге сөгүш жарыялады. Өкмөт башчы: "Жардам жана башка жолдор менен келген каражатты өздөштүрүүдө Жогорку Кеңеште бир жылдап ошол процедуралардан өтө албай жүдөп жүрөсүңөр", - деп нааразы болду. Ал сөгүш берилген жетекчилерге июнь айына чейин гана кемчилигин жоюуга мүмкүнчүлүк берилерин айтты.

"Каржы министри Адылбек Касымалиевге эскертүү жарыялансын. Мындан тышкары экономика министри Артём Новиковго, айыл чарба, тамак-аш өнөр жайы жана мелиорация министри Нурбек Мурашевге, билим берүү жана илим министри Гүлмира Кудайбердиевага, саламаттыкты сактоо министри Талантбек Батыралиевге, жергиликтүү башкаруу жана этникалар аралык мамиле боюнча мамлекеттик агенттиктин директору Бактияр Салиевге, өнөр жай, энергетика жана жер казынасын пайдалануу мамлекеттик комитетинин төрагасы Улан Рыскуловго сөгүш берилет. Силерге өз тармактарыңардын ишин жакшыртууга июнь айына чейин убакыт берилет", - деди Исаков.

Өкмөт башчы көрсөтүлгөн убакытта жыйынтык талап кылынарын, аткарылбаса чара көрүлөрүн белгиледи.