Жогорку Сот Сооронбай Жээнбековдун журналистке 5 миллион сом доосун өндүрүү боюнча чечимин күчүндө калтырды

22-февралда Жогорку Сот президент Сооронбай Жээнбековдун журналист Кабай Карабековго 5 миллион сом доосун өндүрүү боюнча чечимин күчүндө калтырды. Бул тууралуу SUPER.KG`ге Жогорку Соттун басма сөз кызматынан билдиришти.

Буга чейин ишти Свердлов райондук соту карап, өткөн жылы 5-октябрда журналист 5 миллион сом жана 24.кг маалымат агенттиги 5 миллион сом КСДП партиясынан президентикке талапкер Сооронбай Жээнбековго төлөп бериши керек деген чечим чыгарган. Ошол эле жылы 22-декабрда айып пул салган райондун чечимин соттун чечимин шаардык сот күчүндө калтырган. Ушул жылдын 5-февралында президент Сооронбай Жээнбеков 24.кг маалымат агенттигине коюлган 5 миллион сом доосунан баш тарткан. Ал эми журналист Кабай Карабековго карата айып пул боюнча арызды Жээнбеков чакыртып алган эмес.

Эске сала кетсек, 2017-жылы 11-сентябрда аталган агенттикке Кабай Карабековдун экс-президент Алмазбек Атамбаевдин Сочиге барганы боюнча "Сочиге сапар. Кремлге мураскердин артыкчылыгын кайра түшүндүрүп жатышат" деген макаласы жарыяланган. Анда Москва тарапты "ага-ини Жээнбековдордун радикалдуу араб уюмдары менен тыгыз байланышы бар болушу мүмкүн" деген Кыргыз жана Орус атайын кызматтары берген маалымат тынчын алып жатканы тууралуу жазылган. Мындан улам ошол кездеги президенттикке талапкер Жээнбековдун шайлоо штабы сотко кайрылган болчу.