Австралиянын вице-премьер-министри кол алдында иштеген кызматкер менен жакын мамиледе болгондугу үчүн кызматынан баш тартты

Австралиянын вице-премьер-министри Барнаби Жойс кол алдында иштеген кызматкер менен жакын мамиледе болгондугу үчүн кызматынан баш тартты. Бул тууралуу чет элдик басылмалар жазып чыгышты.

Маалым болгондой, 24 жылдан бери никеде туруп, бир нече баланын атасы болгон Жойстун кол алдында мурда иштеген Викки Кэмпион андан кош бойлуу болуп калгандыгы ачыкталган. Мындан улам вице-премьер-министр бийликтен жана Улуттук партиянын лидерлигинен баш тартып, бирок парламенттик мандатын сактап кала турганын айткан.

Министрдин бул жоругу Австралияда коомчулуктун кызуу талкуусун жаратып, жыйынтыгында аталган өлкөнүн премьер-министри Малкольм Тернбулл жаңы эрежелерди киргизүүгө аргасыз болгон. Жаңы регламентке ылайык эми бийлик өкүлдөрү кол алдындагы кызматкерлер менен жакын мамиледе боло алышпайт.