Өлкөдө үч айлык "Таза жашоо" улуттук кампаниясы старт алды

Өкмөт башчы Сапар Исаков өлкөдө "Таза жашоо" улуттук кампаниясы 1-марттан баштап старт алганын жарыялады. Анын видеокайрылуусу камтылган билдирүүнү өкмөттүн басма сөз кызматы таратты.

Маалыматка ылайык, "Таза жашоо" кампаниясы 1-марттан 31-майга чейин уланат. Анын алкагында аймактарды көрктөндүрүү пландаштырылууда. Мындан тышкары айлана-чөйрөнү иретке келтирүү, курулуш жана башка таштандылардын түрүн тазалоо, жөө адамдар басуучу жолдорду куруу, ошондой эле жашылдандыруудан тартып, суу чыгаруу, имараттарды, балдар аянтчаларын жана дагы бир катар объектилерди сырдап-түзөө сыяктуу аймактарды көрктөндүрүү боюнча чараларды камтыйт.