"Жөлөк пул тууралуу мыйзам күчүнө кирип төрөлгөн балага 4 миң сом берилсе, Жогорку Кеңештин VI чакырылышы тарыхта калат" дейт Жумабеков

"Жөлөк пул тууралуу мыйзам күчүнө кирип төрөлгөн балага 4 миң сом берилсе, Жогорку Кеңештин VI чакырылышы тарыхта калат", - дейт бүгүн, 14-мартта парламент жыйынында Жогорку Кеңештин төрагасы Дастанбек Жумабеков.

Жумабеков билдиргендей, өлкө эгемендүүлүк алгандан бери социалдык тармакта мындай реформа болгон эмес. "Сүйүнчү пул" берүү ишин Мамлекеттик каттоо кызматы аткарабы? Аталган кызматтан бул ишти алып салыш керек. Алардын мындан башка жумуштары көп. Паспорт бергенде кандай башаламандык болуп жатат. "Сүйүнчү пулду" бала төрөлгөндө төрөтканадан берүү зарыл", - деди спикер.

Вице-премьер-министр Чолпон Султанбекова бул иш Мамлекеттик каттоо кызматына берилбегенин айтты. "Аталган кызмат баланын күбөлүгүн гана берет. Кээ бир райондордо "сүйүнчү пул" төрөт үйлөрүндө берилип жатат", - деди Султанбекова.