"Коопсуздук кеңешинин коррупцияга каршы иштери эки жыл ичинде натыйжа берет" дейт Сагынбаев

Коопсуздук кеңешинин коррупцияга каршы иштери эки жыл ичинде натыйжа берет. Бул тууралуу бүгүн, 14-мартта маалымат жыйынында Коопсуздук кеңештин катчысы Дамирбек Сагынбаев билдирди.

"Бул 45 иш-чаранын аткарылышы ар кайсы убакытка белгиленген. Тактап айтканда, айрымдары 1-мартка, 1-июнга, 1-августка жана 2018-жылдын аягына чейин аткарылышы керектиги, калгандары 2019-жылы аткарылат. Бирок алгачкы жыйынтыктары ушул жылдын июнь-июль айларында натыйжа бере баштайт", - деди Сагынбаев.

Мындан тышкары ал укук коргоо, сот жана көзөмөл органдарынын кызматкерлеринин шек санаткан декларациясы боюнча жооп берди.

"Укук коргоо, сот жана көзөмөл органдарынын кызматкерлеринин шек санаткан декларациясы жазуу түрүндөгү макулдук менен атайын комиссияга берилип текшерилип чыгат. Комиссиянын курамында ошол эле салык, укук коргоо, сот жана көзөмөл органдарынын кызматкерлери болот. Алар текшерип чыгып, Башкы прокуратурага өткөрүп берет. Ал эми Коопсуздук кеңеши ага көзөмөл салып турат", - деп кошумчалады Сагынбаев.

Айта кетсек, 8-февралда президент Сооронбай Жээнбековдун төрагалыгы астында Коопсуздук кеңешинин жыйыны өткөн. Анда 45 иш-чараны камтыган чечим кабыл алынган. Алардын көпчүлүгү укук коргоо, сот жана көзөмөл органдарындагы коррупциянын алдын алууга багытталган.