"Орусияга барып бекер иштеп келгенин айткан кызды дүкөнүбүзгө администратор кылалы дегенбиз, иштей алган жок" дейт жумуш берүүчүлөр

Орусияга сатуучу болуп иштегени барган Гуля (аты өзгөртүлгөн) жумуш берүүчүлөрдүн орой мамилесинен улам мекенине бир да сом айлык албай келдим деп редакциябызга кайрылган. Бул окуядан кийин жумуш берүүчүмүн деп Гулнар аттуу аял байланышка чыгып, айтылган сөздөр жалган экенин, жабырлануучу түзүлгөн келишимдеги тартипти бузганы үчүн жумуштан кеткенин айтып берди.

"Биз акыркы 4 жылдан бери Орусиядагы дүкөнүбүзгө кыргыз кыздарды алып барып иштеп жүрөбүз. Ошол сыңары эле декабрь айында сатуучу болуп иштегенге кыз керек болуп, Ош базарындагы радио түйүнгө жарыя бергем. Анан мага ушул кыз байланышка чыкты. Мен ага эмне жумуш, иштөө тартип кандай экенин да айтып бердим. Ал ата-энем оорукчан, иштешим керек деп айтты. Анан биз жумуш тууралуу көпкө сүйлөшүп, аягында келишимге кол коюп, 27-декабрда Калининград шаарына кетмек болдук. Менде анын сүйлөгөн сөздөрүнөн, тилди билгенинен улам аны дүкөнгө администратор кылсамбы деген да ой келген.

Мен өзүм Гуляны алып баргандан кийин жашай турган жерин, иштеген дүкөндү көрсөтүп, кыздарга баш-көз болгон күйөө балам, кызым менен тааныштырып, кайра Бишкекке кетип калдым. Гуляга мен көп жолу жумушту майда-чүйдөсүнө чейин үйрөн деп айттым. Себеби 1 жарым жылдан бери иштеген кызыбыз кетип жаткандыктан анын ордуна Гуля иштеши керек эле. Бирок мага күндө ал кыз тууралуу ар кандай маалыматтар угула баштады. Көбүнчө айтканды укпай, каяша айтып өзү каалагандай жүргөнүн айтышты. Ал иштебей жатып менден айлык да сурап жүрдү. Келгенине эми бир ай боло электе мен ага каяктагы акчаны беришим керек. Алгач жумушту үйрөнүп анан сураса да мейли дейм да. Анан дагы мен барып келишинин билетин алып бердим, ичкен-жегени булар эмне эсепке кирбейби? Анан дагы жөн жүрбөй иштеген кыздарды азгырып үйдө бир канча жолу жаңжал чыгарыптыр. Анан акырында кызым менен сүйлөшүп жумуштан кетирели деп чечтик", - деди ал.

Гулнар айымдын айтуусунда, кыз телефонун аэропортко жеткенде ыргытып жиберген, эч кандай кагазга кол койдуруу болгон эмес. Ошондой эле түзүлгөн келишимде учактын билети бекер болбогонун кошумчалайт.

"Мен бул кыздын оюн түшүнүп турам, анын оюнча алынган билеттер бекер болуп, биз эки айга жетпей иштеген акчасын беришибиз керек болгон экен. Мен эмнеге иштебей ызы-чуу чыгарган кызга айлык төлөшүм керек. Балким бул кыз алдамчы же менден акча өндүргүсү келип жаткандыр", - дейт жумуш берүүчү.

Ал эми учурда аталган шаардагы дүкөндү иштеткен Гулнардын күйөө баласы Нурлан аттуу мырза бизге байланышка чыгып, мындай окуялар орун албаганын, келгенине эки ай боло электе иштебейм деп айткандыктан учактын билетин алып, мекенине салып жибергенин кошумчалады.

Эске салсак, Орусияга 24 жаштагы Гуля "Ош базарынан" жумуш издеп жүрүп таанышкан Гүлнар аттуу аял менен өткөн жылдын декабрь айында кеткен. Ал дүкөндө сатуучу болуп иштеп, айына 20 миң рубль айлык акы ала турганы боюнча кагаз түрүндө келишим да түзүлгөн. Бирок аталган шаарга келгенде алданып калганын билип, мекенине кетүүгө жол издеп баштаганын SUPER.KG порталына билдирген. Кыз 24-февралда Свердлов РИИБине арыз менен кайрылып, жабыркаган адамдарынын сүрөтүн, телефон номерин жана тийиштүү документтерди тапшырганын айткан.

Бул окуя боюнча Бишкек ШИИББинин басма сөз кызматы: "24-февралда Свердлов РИИБине аталган жабырлануучудан арыз түшкөнү чын. Бирок арызда жазылган адамдын жашаган жери аныкталбагандыктан тергөөчү тарабынан кылмыш иши кабыл алынган эмес", - деп билдиришти.

Ал эми ушул эле окуядан кийин бизге дагы эки жаран жабырлануучумун деп өзүн тааныштырып, алар да ушул эле жумуш берүүчүлөрдө иштеп кетишкендиктерин, алар да Гуля кабылгандай эле орой мамилеге кабылганын, келишимдеги жазылган нормалар сакталбаганын айтышты.