Швейцария Ош жана Нарын облустарына жергиликтүү маанидеги маселелерди чечүүгө 38 миллион сом берет

Швейцария өкмөтү Ош жана Нарын облустарынын 23 айыл өкмөтүндөгү жергиликтүү маанидеги маселелерди чечүүгө 38 миллион сом грант бөлөт. Гранттык макулдашууга бүгүн, 23-мартта Бишкекте кол коюлду. Ага президенттик аппараттын, өкмөттүн, жергиликтүү өз алдынча башкаруу органдарынын жана Швейцариянын элчилигинин өкүлдөрү катышты.

Маалым болгондой, 15-мартта чакан гранттар программасынын сынагынын жыйынтыктары чыккан. Бул сынакка жалпысынан эки облустун айыл өкмөттөрүнөн 121 өтүнмө түшүп, комиссия долбоордун критерийлерине жана талаптарына жооп берген 80 өтүнмөнү карап чыккан. Жыйынтыгында комиссия мүчөлөрү ар бир өтүнмөгө коюп чыккан баллдарды кошкондон кийин сынакта эң көп балл алган 38 жеңүүчү аныкталган.

Долбоордун жетекчиси Бекболот Бекиев 2018-жылы бир долбоор үчүн гранттын суммасы 1 миллион сомду түзөрүн айтты. "Сынакка түшкөн бардык өтүнмөлөр реалдуу көйгөйлөрдү чечүүгө багытталган. Бул көйгөйлөрдү жергиликтүү өз алдынча башкаруу органдары уюштурган коомдук угуулар жана айылдык чогулуштар маалында жергиликтүү жамаат талкуулап, артыкчылыктуу маселе катары өздөрү тандап алышкан. Көз карандысыз сынактык комиссия долбоорлорго баа берип, жеңүүчүлөрдү тандап алган. Эми жергиликтүү кеңеш жана жергиликтүү жамаат бул долбоорлордун ишке ашырылышын тикелей көзөмөлдөшөт. Ошентип жергиликтүү өз алдынча башкаруу органдары менен жергиликтүү жамаат муниципалитеттеги артыкчылыктуу көйгөйлөрдү чогуу чечкенди үйрөнүшүп, адамдардын турмуш шартын биргелешип жакшыртышат”, - деди Бекиев.