Президент: "Марттагы революциянын сабактары бизди бийик максатка багыттап, туура жолдон тайбагыла деп эскертип турат"

Бүгүн, 24-мартта президент Сооронбай Жээнбеков 2005-жылдын 24-мартындагы элдик революциянын 13 жылдыгына байланыштуу кайрылуу жасады. Бул тууралуу президенттик аппараттын басма сөз кызматы билдирди.

"2005-жылдын 24-мартындагы элдик революция эгемендүү Кыргыз мамлекетинин соңку тарыхында өзгөчө орунду ээлейт. Ушул күнү кыргыз эли адилетсиздикке, мыйзамсыздыкка жана үй-бүлөлүк башкарууга каршы көтөрүлгөн. Кылымдарды карыткан кыргыз эли майтарылбас кайратын, эркиндикти жана адилеттикти баарынан бийик тута турганын дагы бир ирет далилдеген.

Тилекке каршы, элибиздин калыс бийликти, адилет башкарууну орнотобуз деген ошондогу үмүтү акталбай, элдик революция максатына жетпей калды. Элдин кызыкчылыгы тебеленип, мурдагыдан да катаал үй-бүлөлүк режим орноп, мамлекеттин байлыгы тонолду. Баш көтөргөндөр куугунтукталып, бийлик айрымдарын өлтүргөндөн кайра тартпады. Марттагы элдик революция элдин келечегин көздөгөн асыл максаттар дайыма коргоого муктаж экенин далилдеди.

Эгемендүү мамлекетибиздин соңку тарыхындагы алгачкы элдик революцияны биз эч качан эстен чыгарууга акыбыз жок. 2002-жылдагы Аксы окуяларынан, 2005-жылдагы март элдик революциясынан сабак алууга милдеттүүбүз. Элдин эрки, Апрель революциясынын шарапаты менен бизге экинчи ирет тарыхый мүмкүнчүлүк берилди.

Ата-бабаларыбыз кыялданган, жаркын келечек үчүн курман болгон мекендештерибиз эңсеген коомду адилеттүү, адам укугун урматтаган, эркин жана өнүккөн Кыргыз өлкөсүн куруу милдети биздин моюнубузда. Элдин ишенимине ээ болгондо гана бийлик күчтүү болот.

Марттагы элдик революциянын сабактары бизди мына ушул бийик максатка багыттап, туура жолдон тайбагыла деп ар дайым эскертип турат", - деп айтылат кайрылууда.