"ЭЛДИК КАБАРга" жооп: "9-жатакана толугу менен оңдоп-түзөөдөн өтүшү керек. Электр жарыгы коопсуздук үчүн өчүрүлдү"

"Элдик кабарга" окурман "Кыргыз улуттук университетинин 9-жатаканасынын жашоочуларын чыгуусун, бөлмөлөрдү бошотуусун талап кылган жетекчилик тараптан жатакананын электр жарыгын өчүрүлдү" деп билдирген.

Бул боюнча аталган окуу жайдын башкы инженери Адылбек Маматов SUPER.KG порталына окуянын чоо-жайын айтып берди.

Ал билдиргендей, оңдоп-түзөө иштери жүрүп жатканда жатакананын жашоочуларын башка жакка жашап туруусу эскертилген.

"9-жатакананын абалын 2018-жылдын 20-январында Экологиялык жана техникалык коопсуздук боюнча мамлекеттик инспекциясы текшерип, имарат авариялык абалда экенин айткан. Бүгүнкү күндө жатакананын чатыры, жылуулук түтүкчөлөрү, канализациясы жана электр зымдарын толугу менен оңдоп-түзөөдөн өтүшү керек. Биз жашоочуларга 25-январдан тарта 1-апрелге чейин көчкүлө деп эскертип жатабыз. Буга чейин жааган жамгырдан электр шаймандарына суу тамчылап кооптуу кырдаал жаралганы үчүн электр жарыгын өчүрдүк. Жашоочулардын жаш балдары бар кокустук болуп кетсе ага биз жооп беребиз. Ошондуктан коопсуздукту алдын алуу максатында электр жарыгын өчүрдүк", - дейт Маматов.

Мындан тышкары тийиштүү документтерде жатакана окутуучуларга эмес студенттерге арналганын, бирок бүгүнкү күндө жашоочулардын көпчүлүк бөлүгүн мугалимдер түзөрүн айтышты.