Түркияда каза болгон Кыргыз кызынын сөөгү Кыргыз өлкөсүнө эртең алынып келет

Түркияда каза болгон 26 жаштагы Кыргыз кызынын сөөгү Кыргыз өлкөсүнө эртең, 25-мартта алынып келет. Мындай маалыматты бүгүн, 24-мартта SUPER.KG порталына Тышкы иштер министрлигинин басма сөз кызматы билдирди.

Маалыматка ылайык, кыздын сөөгүн алып келүүгө Кыргыз элчилиги, Кыргыз диаспорасы, агасынын Измирдеги тааныштары жардамдашты. Ал эми туугандары бара алышкан эмес.

Эске салсак, кыздын жансыз денеси 19-мартта эртең менен саат 9:40 чамасында Памуккале районундагы унаа жолунан табылган. Ал 1992-жылы туулган кыргыз кызы Ж.кызы Ы. болгон. Учурда бул боюнча Денизли прокуратурасы кылмыш ишин козгоду.

Ал эми чет элдик басылмалар маркум кыз муунтуп өлтүрүлүп, андан соң үстүнөн унаа тебелеп кеткенин жазышкан. Окуядан алыс эмес жерден каза болгон кызга таандык паспорт жана уюлдук телефон табылган. Анын жансыз денесин эртең менен талаадан келе жатышкан адамдар көрүп, полиция кызматына кабарлашкан.