Сооронбай Жээнбеков: "Президент катары мен үй-бүлөлүк-кландык башкарууга жол бербейм"

5-апрелде президент Сооронбай Жээнбеков Апрель окуясынын катышуучулары, жабыр тарткандардын жана курман болгондордун үй-бүлөлөрүнүн коомдук уюмдарынын өкүлдөрү менен жолугушту. Бул тууралуу президенттик аппараттын басма сөз кызматы билдирди.

Маалыматка ылайык, жолугушуу Апрель революциясынын курман болгон баатырларынын элесине арнап куран түшүрүүдөн башталды.

Сооронбай Жээнбеков Кыргыз мамлекети калыптануунун татаал жолун басып өткөнүн, экономикалык, саясий кыйынчылыктарды баштан кечиргенин белгиледи. Бирок бардык сыноолорго карабастан, өлкө эли өз мамлекеттүүлүгүн сактап калды жана майтарылбас эркин көрсөттү.

"Кыргыз мамлекетинин тарыхында бир максатка биригип, өз эркиндигин сактап калуу үчүн чогуу күрөшкөн мисалдар аз эмес. Элдик апрель революциясы мына ошондой баатырдык мисалдардын бири болуп саналат. 2010-жылдын 7-апрели - кыргыз элине эркиндикке жана өнүгүүгө карай жол ачкан тарыхый окуя. Биздин эркиндикти сүйгөн элибиз үй-бүлөлүк-кландык башкаруу менен эч качан келишпестигин жана чөгөлөп жашабай турганын дагы бир жолу көрсөттү", - дейт президент.

Жээнбеков Апрель окуяларынын катышуучуларына кайрылып, алардын каармандыкты жана эрктүүлүктү көрсөткөнүн белгиледи. "Өз өмүрүңүздөрдү аябастан өлкөнү кыйроодон сактап калдыңыздар. Сиздер мөндүрдөй жааган октон жалтанбай "Ала-Тоо" аянтында өлүмгө бетме-бет каршы турдуңуздар. Силердин эрдигиңер кыргыз элинин эсинде түбөлүккө сакталып калат.

Үй-бүлөлүк-кландык режимге каршы күрөштүн башатында турган адам катары мен 2010-жылдын апрелиндеги жеңиш кандай оорчулук менен келгенин билем. Ошондуктан президент катары мен үй-бүлөлүк-кландык башкарууга жол бербейм деп кепилдик берем. Көптөгөн адамдар өлкөдө кайрадан айрым саясий топтордун кызыкчылыктары үстөмдүк кылышын каалай турганын билем, бирок мен ага эч убакта жол бербейм. Биздин өлкөбүздө парламенттик демократия өнүгүшү үчүн бардык күч-аракетимди жумшайм. Биздин келечегибиз ушуга байланыштуу болот", - деди президент.

Сооронбай Жээнбеков Кыргыз мамлекетинин президенти болуп турганда үй-бүлөлүк-кландык башкаруунун кайталанышына жол бербей турганын билдирди.

Жолугушуунун катышуучулары коррупцияга каршы күрөшүү жана өлкө аймактарын өнүктүрүү боюнча президенттин аракеттерин колдошту.

Жолугушууга "Мекен шейиттери", "Эр Теги", "Апрель Баатырлары", "Айкөл Ала-Тоо", "Апрель. Элим. Кыргызстан", "Айкөл таза коом", "Апрель байрагы", "Элдик сакчы", "Элдик кайрат", "Мекен үчүн", "Орток шамы" коомдук уюмдарынын, "Патриот" ыктыярдуу элдик кошуунунун жана "Каркыра" элдик кошуунунун өкүлдөрү катышты.