Райондук сот Тогуз-Тородо кармалган үч аялды жана бир мектеп окуучусун камактан бошотту. Калган 11 адам 2 айга камалды

Тогуз-Тородо кармалган 15 адамдын арасынан үч аял жана бир мектеп окуучусу бошотулду. Мындай чечим Бишкектеги Биринчи Май райондук соту тарабынан кабыл алынды. Бул тууралуу SUPER.KG'ге сот отурумуна катышкан Тогуз-Торо районунун тургуну Рахатбек Садыралиев кабарлады.

Анын айтымында, калган 11 адам эки айга камакка алынды. Алардын арасында экөө мектеп окуучулары.

Айта кетсек, буга чейин Тогуз-Тородо миңден ашуун адамдын катышуусунда митинг болгон. Алар аймактагы алтын ылгоочу комбинаттын курулушу токтотулуусун талап кылышкан. Митингдин жүрүшүндө алтын ылгоочу комбинаттын имараты өрттөлүп,ыргытылган таштан 3 милиция кызматкери жана жергиликтүү тургун жаракат алып ооруканага кайрылган. Кийин бул окуяга байланыштуу райондун акими кызматынан алынган. Ошондой эле кылмыш иши козголуп, 150дөй адам суракка алынып, 15и Бишкекке алынып келип, камакка алынган. Алардын үчөө аял болсо, биринин эмчектеги баласы бар.

Аларды бошотуу талабы менен район эли район борборуна жана Бишкекте митингге чыгышкан.