Исаков, Оторбаев, Шыкмаматов... ЖЭБ боюнча депутаттык комиссиянын корутундусуна кимдердин аттары кирди (тизме)

Кытайдан алынган 386 миллион долларга Бишкек ЖЭБин жаңылоодо пайда болгон күмөндүү жагдайларды иликтеген депутаттык комиссия 8-майда корутундуну кабыл алган.

Бул документте ЖЭБди жаңылоого тиешелүү жетекчилердин аты-жөнү, ишти кимдер баштаган, ким уруксат берген, сүйлөшүүнү ким жүргүзгөнү, документтерге ким кол койгону камтылган. Корутундуда аты аталган 30га жакын адамдын ишине укуктук баа берүү сунушталат. Алар:

• Экс-премьер-министр Жантөрө Сатыбалдиев,
• Экс-премьер-министр Жоомарт Оторбаев,
• Президенттик аппараттын тышкы саясат бөлүмүнүн ошол кездеги башчысы, мурдагы премьер-министр Сапар Исаков,
• “Улуттук энергетикалык холдингдин” жана Энергетика министрлигинин мурдагы жетекчиси Айбек Калиев,
• Мурдагы экономика министри Темир Сариев,
• Жогорку Кеңештин депутаты Кожобек Рыспаев,
• Жогорку Кеңештин экс-депутаттары Турсунтай Салимов, Гүлнара Жамгырчиева,
• Мурдагы энергетика министри Осмонбек Артыкбаев,
• Мурдагы каржы министри Ольга Лаврова,
• Каржы министринин азыркы орун басары Мирлан Байгөнчөков,
• Мурдагы юстиция министри Алмамбет Шыкмаматов,
• Экономика министринин мурдагы орун басары Санжар Муканбетов,
• Тышкы иштер министри Эрлан Абдылдаев,
• Экотехинспекциянын башчысы Канатбек Муратбеков,
• Курулуш жана архитектура агенттигинин мурдагы башчысы Турдубек Мамбетов,
• “Электр станциялары” ишканасынын мурдагы башчылары Салайдин Авазов, Абдылда Исраилов, Таалайбек Толубаев, Узак Кыдырбаев,
• Бишкек ЖЭБинин экс-директору Нурлан Өмүркул уулу,
• Бишкек ЖЭБинин учурдагы директору Андрей Воропаев,
• Өнөр жай, энергетика жана жер казынасын пайдалануу комитетинин учурдагы башчысы Улан Рыскулов,
• Экотехинспекциянын инспектору Шараф Ачилдиев,
• Архитектура, курулуш жана турак жай-коммуналдык чарба агенттигинин мамлекеттик экспертиза департаментинин экс-директору М.Акматалиев,
• ӨКМнын Өрткө каршы агенттигинин Д.Абдираев.

Кечээ комиссиянын курамындагы үч депутат иш сапарда болгондуктан кол коюшкан жок. Алар келгенден кийин таанышып чыгып кол коюшмакчы. Эртең, 10-майда депутаттык комиссиянын корутундусу Жогорку Кеңештин жыйынында айтылат.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн. Анын курамы:

"Өнүгүү-Прогресс" фракциясынан Исхак Масалиев;

КСДП фракциясынан Данияр Аттокуров, Аида Касымалиева, Аалы Карашев, Улан Примов (комиссиянын төрагасы);

"Бир Бол" фракциясынан Мыктыбек Абдылдаев;

"Ата Мекен" фракциясынан Сайдулла Нышанов;

"Республика-Ата Журт" фракциясынан Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан Исланбек Сарсейитов, Алмазбек Токторов.