Окуу жылынын башталышын 10-сентябрга жылдыруу боюнча сурамжылоонун жыйынтыгы белгилүү болду

Окуу жылынын башталышын 10-сентябрга жылдыруу боюнча сурамжылоонун жыйынтыгы белгилүү болгонун Билим берүү жана илим министрлигинин маалымат кызматы 17-майда SUPER.KG порталына кабарлады.

Маалыматка ылайык, сурамжылоону коомдук пикирди изилдөө жана болжолдоо "Эл-Пикир" борбору жүргүзгөн. Ага катышкан ата-энелердин 54 пайызы үчүн балдардын эс алуусуна кошумча күн кошулуп жатканы маанилүү экендиги белгилүү болгон. Сурамжылоого 2 миң 37 окуучу, 595 мугалим (анын ичинде директор жана орун басарлары) жана 4 миң 120 ата-эне катышкан. Кырдаалды терең изилдөө үчүн мугалимдер жана ата-энелер менен тайпалык талкуулар, эксперттер менен кылдат маек өткөрүлгөн.

Анын жыйынтыгында башка региондордун тургундарына салыштырмалуу балдардын эс алуусуна кошумча күндү колдогондордун көпчүлүк бөлүгү нарындыктар болгон. Жалпылап айтканда сурамжылоого тартылгандардын 63,7 пайызы окуу жылын 10-сентябрга жылдырууну колдогон. Жалпысынан мугалимдердин 64,7 пайызы жана ата-энелердин 50,9 пайызы окуу жылынын 10 -сентябрга жылышы балдардын билим алуусуна таасир этпейт деп эсептерин билдиришкен. Атүгүл суроого жооп берген ар бир төртүнчү мугалимдин жана ар бир үчүнчү ата-эненин окуу жылдын башталышы которулган учурда балдардын биринчи чейректеги жетүшүүсү жогорулайт деген ишеними бар экени аныкталган. Изилдөөнүн жүрүшүндө мугалимдердин 64,7 пайызы жана ата-энелердин 50,9 пайызы окуу жылынын 10-сентябрга жылышы балдардын билим алуусуна таасир этпейт деп эсептегени аныкталган. Ата-энелердин жана окуучулардын дээрлик баары үй-бүлөлүк бизнеске окуучулардын жардамы зарыл болгон күндө да, балдар дайыма мектепке барышы керек деп эсептешет.

Окуу жылынын 10 күнгө кеч башталуусуна гимназия, лицей макамдарын алып жүргөн атайын багыттагы мектептердин мугалимдеринин көпчүлүгү каршы пикирин билдирген. Алардын көпчүлүгү башка өлкөлөрдүн тажрыйбаларына кайрылып көрүп, буга макул эместигин билдиришкен.

Буга чейин билим берүү жана илим министри Гүлмира Кудайбердиева окуу жылынын башталышын 10 күнгө артка жылдыруу балдардын ден соолугуна пайдалуу экенин айткан.