Казакстанда 19 жаштагы кыз менингит оорусунан улам каза болду

Алматыда менингит дартына кабылган 19 жаштагы кыз каза болду. Мындай маалыматты чет элдик басылмалар жазып чыкты.

Белгилүү болгондой, кечээ, 2-июнда Алматы облустук жугуштуу оорулар ооруканасына 19 жаштагы кыз оор абалда келип түшкөн. Бирок ал 2 сааттан кийин көз жумган. Дарыгерлердин айтымында, кыз оорусу күчөп кеткенде кайрылган.

Казак маалымат агенттиктеринин маалыматына караганда, 1-июнда Казакстандын Алматы шаарында менингококк вирусунан беш жаштагы бала көз жумган. Ал эми каза болгон кыз 5 жаштагы баланын жакын тууганы менен мамиледе болгондугу айтылган. 19 жаштагы кыз досу менен бирге 5 жаштагы баланы алып кетүү үчүн бала бакчага барган болушу мүмкүн. Мындан улам ал аба аркылуу менингококк инфекциясын жуктуруп алган деп кошумчаланган.

Менингококк инфекциясы - курч жугуштуу оору. Ал аба аркылуу да жугат. Оору майыптыкка алып келиши же өлүм менен аякташы мүмкүн.