Менин жерим: Көк мелжиген тоолордун арасында жайгашкан Ат-Башынын Көл-Төрү

Адатта чет өлкөлүк коноктор Кыргыз өлкөсүн эң эле жаратылышы кооз өлкөлөрдүн катарына киргизет. Көк тиреген ак мөңгүлүү тоолору, сай-сайлап аккан тунук булактары элибиздин баа жеткис, жаратылыш тарабынан тартууланган байлыгы.

Өлкөнүн тоо арасында катылган көлдөрү ондоп саналат. Ошондой көлдөрдүн бири Нарын кырка тоосунун түштүк капталында жайгашкан Көл-Төр көлү. Аталган көл Ат-Башы районунун аймагында жайгашкан. Аянты 5 чарчы чакырым. Көл-Төр деңиз деңгээлинен 3 миң 820 метр бийиктикте жайгашып, Көл-Төр суусунун өрөөнүнөн орун алган.

Эл арасында көл мөңгүлөрдүн эришинен улам пайда болгон деген кептер айтылып келет. Көл жаан-чачын, кардын суулары менен толукталып турат. Чыгыш тарабы бийик аскалуу жээк, батышынан жол өтөт. Айланасында ар кандай бадал өсүмдүктөрү өсөт, мисалы, ит мурун, төө куйрук жана башка. Көлдөн агып чыккан суу Ат-Башы суусуна куюлат.