Маршруттук таксинин ичинде жүргүнчү аялга кол көтөргөн айдоочу кармалса административдик жазага тартылат

"Социалдык тармактар аркылуу тарап жаткан видеодогу өз жүргүнчүсүнө кол көтөргөн айдоочу изделип жатат. Ал кармалса коомдук транспортто тартип бузгандыгы үчүн административдик жазага тартылат". Мындай маалыматты Чүй облустук Жол кыймылынын коопсуздугун камсыздоо башкармалыгынын маалымат кызматы билдирди.

"Учурда айдоочунун каттамдагы маршруттук таксиси кайда токтотулганын билебиз. Ал эми айдоочу өзү изделип жатат. Коомчулук билгендей, айдоочу сабырын жоготуп, жүргүнчү аялга кол көтөргөн. Натыйжада таксидеги башка жүргүнчүлөр арачы түшүшкөн. Буга карабай ал аялды бир нече ирет чапканга жетишкен. Ошондой эле маршруттук таксидеги балдар ыйлап, коркуп калышкан. Бул көрүнүш коомдук транспортто тартип бузуу катары катталып, ошого жараша айдоочуга чара көрүлөт", - деп билдиришти мекемеден.

Окуя боюнча Чүй ОИИББине кайрылганыбызда, аталган кызматтын маалымат катчылыгы айдоочунун үстүнөн арыз түшө электигин билдирди. "Эгерде айдоочуга карата жүргүнчүлөр тарабынан арыз жазылса, тиешелүү берененин негизинде чара көрүлөт", - деди маалымат кызматы. Учурда айдоочу изделип жатат.

Эскерте кетсек, SUPER.KG'нин "Элдик видео" бөлүмүнө "Айдоочу менен жүргүнчү аял чырдаша кетип, айдоочу ага кол көтөрдү" деген видео жүктөлгөн. Бул видео социалдык тармактарда да талкууга алынган. Анда айдоочу жүргүнчүлөрдүн "музыканын үнүн кичирейтип кой" деген талабына ачууланып, алдыңкы катарда отурган аялга кол көтөргөнүн, каттамда кетип бара жаткан балдар ыйлап, жаңжал жаралганын көрүүгө болот. Ошондой эле бул айдоочу №302-Бишкек-Кара-Балта каттамындагы маршруттук таксини айдай турганы маалым болгон.